paidovento

Parque do pasatempo en Betanzos

Como ben sabedes, esta noite houbo que atrasar os reloxos unha hora. Polo tanto, houbo unha hora máis. Isto, cando eramos novos, era unha boísima noticia, xa que supuña unha hora máis de troula, unha hora máis de risos cos amigos, unha hora máis de diversión un sábado pola noite. Esta noite tamén nos alegrou contar con 60 minutos a maiores, fundamentalmente para relaxar un pouco as rutinas diarias, mais as consecuencias do cambio xa non nos gustan tanto, sobre todo porque as tardes fanse extremadamente curtas e a luz do sol bótase moito en falta. Seica se fai por aquilo do aforro enerxético, mais en Galicia é así realmente? Segundo o INELGA o aforro doméstico de enerxía é, flipade, dun 1%. Iso si que é precisión. Ben, o que non nos cabe na cabeciña é que se o solpor se aproxima case simultaneamente en Dublín, Londres, Lisboa e Compostela, por que aquí temos o reloxo adiantado? Será por aquilo de corrixir o atraso secular de Galicia ou será simplemente para ter algo de que falar e para poder espetarlle a alguén: “Cala, que ti vas pola vella”.

Os que queirades afondar no tema podedes entrar en http://www.hora.es/mundo/europa.jsp e veredes o variado que é o vello continente, tamén na hora.

Nestes tempos críticos mesmo parece unha excentricidade falar dun millonario excéntrico, mais non tanto. Un exemplo, hai uns días dixeron na caixa boba que, mentres que as vendas dos coches baixaron en xeral unha burrada, houbo unha marca que subiu as súas facturacións considerablemente, e esa marca era “Audi” (como ben sabedes, especializada en utililitarios). En fin, ao que imos, paideleo instoume a facer este orixinal meme. Aí vai:

Se fose millonario…

1: Pasaría o tempo viaxando por todo o mundo coa muller e os fillos. Non había quedar recuncho por explorar. Non descarto as viaxes espaciais, mais de momento aínda están pouco “rodadas”.

2: Faría construír un circuito privado, dotado con varios cars, coches e motos, para soltar adrenalina e gozar cos amigos, sen mancarnos e sen molestar a ninguén, agás o medio ambiente por aquilo do CO2.

3: Crearía unha produtora de cinema de calidade. Só produciría filmes dos mellores directores, cos mellores guións, cos mellores actores… e en Galiza só se pasarían copias en galego.

4: Practicaría deportes de risco: paracaidismo, ala delta, parapente, rafting…

5: Subvencionaría a todas as empresas que puidese para que reducisen a semana laboral a 10 horas (2 por día).

Obviamente, falamos de excentricidades, se tal situación se dese as propostas deberían ter máis sentidiño.

Pode coller o meme quen queira.

Hai xente, supoño que miúda, á que lle encanta fozar en calquera letra que vexa impresa. Moitas veces isto de andar a remexer na cartelada o único que fai é crear confusión e poñernos de mal humor, mais de cando en vez aparece alguén con ideas e fainos rir (converter un R nun P, un L nun I, etc. pode transformar “roda” en “poda”, “lodo” en “iodo”…) Ao caso, hoxe déronnos no taller un coche de substitución (e xa vai a terceira vez en ano e medio) cun rótulo que nós non viramos pero que descubriu de contado a moza da gasolineira que nos atendeu. Aínda rimos un cacho.

Cumprindo coa encarga de mer, procedemos a expoñer que fariamos se só nos quedase un día de vida:

Que canción che gustaría escoitar?

Supoño que escoitaría máis dunha, aínda que posiblemente escollería un tema que hai anos que non o poño: “Stairway to heaven”, de Led Zeppelin.

A que libro lle botarías un ollo?

Non estou seguro de que fose capaz de concentrarme na lectura de algo. Coido que elixiría algún clásico de relatos curtos, talvez Retrincos, de Castelao.

Con quen che gustaría falar?

Con toda a xente que puidese, sobre todo cos amigos e coa familia, e dentro desta cos meus pais, coa miña muller e máis que nada cos meus fillos.

Que che gustaría comer?

Por suposto, polbo á feira. Total, o colesterol non tería tempo de me amolar.

Que farías e que che queda pendente por facer?

Pendente por facer quedaríanme unha chea de cousas que non se poden facer nun día (viaxes, fundamentalmente). Creo que practicaría algo extremo, non sei, “puenting”, parapente… e tamén me daría un “revolcón” coa dona, para levar bo sabor de boca deste mundo.

Xa está, pásolles o meme a leo e os seus , Aquam latam , manuel l. rodrigues e ler arreo